Ein Cenhadaeth
Mae Cegin y Bobl yn cynnal rhaglenni addysg bwyd trawsnewidiol a ddatblygwyd gan rai o gogyddion, tyfwyr ac arbenigwyr bwyd gorau Cymru. Mae ein gwaith yn adeiladu ar y rhaglen lwyddiannus o’r enw Cook24 a gynhaliwyd gan Goleg Sir Gâr yn 2023-4.
Rydyn ni'n credu y gall sgiliau bwyd a choginio helpu i ddatrys cymaint o'r problemau anodd rydyn ni'n eu hwynebu heddiw: clefydau sy'n deillio o’n diet, unigedd a phryder, a'r argyfwng mewn ffermio, bioamrywiaeth a chost byw. Drwy newid meddylfryd, o geginau cartref i ysgolion ac o dyfwyr i wneuthurwyr polisi, rydyn ni'n newid systemau bwyd er mwyn trawsnewid dyfodol bwyd i bawb.
Darganfod Bwyd
Mae'r cwrs 6 wythnos hwn yn helpu plant i ddechrau coginio, gan feithrin rhyddid, cyfrifoldeb a pharch yn y gegin, yn yr ystafell ddosbarth ac ar y fferm. Y nod yw newid perthynas plant â bwyd, trwy goginio.
Rydym wedi gweld presenoldeb a ffocws gwell yn deillio o hyn, a’r plant yn falch o'r hyn maen nhw wedi'i wneud ac yn agored i roi cynnig ar fwydydd a blasau newydd. Mae teuluoedd yn coginio mwy o bwyd ffres, ac mae athrawon yn gweld y gwahaniaeth o ddydd i ddydd.
Arweinyddiaeth Fwyd
Mae ein rhaglen arweinyddiaeth fwyd yn helpu athrawon ac arweinwyr cymunedol i wneud bwyd yn rym er gwell yn eu hysgolion a’u cymunedau. Dros bedwar diwrnod o sesiynau, maent yn adeiladu sgiliau, hyder, ac yn creu cynllun i drawsnewid lle bwyd yn eu hysgolion neu eu cymunedau eu hun.
Wrth gymryd rhan byddwch yn gadael gyda'r wybodaeth, y technegau - a'r hyder y gall bwyd newid bywydau.
Coginio Gartref
Rydym yn cynnig cyrsiau coginio cartref 6 wythnos i bawb—o ddefnyddwyr banciau bwyd i rieni a grwpiau cymunedol. Rydym yn adeiladu hyder i goginio bwyd iach a blasus, o gynhwysion syml a fforddiadwy.
Mae’r cyrsiau'n cwmpasu sgiliau coginio sylfaenol, cynllunio bwydlenni, cyllidebu, a lleihau gwastraff bwyd. Byddwchyn gadael gyda sgiliau newydd, cymhelliant ac egni, a safbwynt hollol newydd ar fwyd.
Coginio Awyr Agored
Dan arweiniad y cogydd Polly Baldwin, sylfaenydd "The Jolly Allotment", mae ein Gweithdy Coginio Awyr Agored yn cynnig profiad coginio unigryw.
Mae'r sesiwn undydd hon, sydd ar agor i ysgolion a grwpiau cymunedol, yn dysgu pobl i goginio yn yr awyr agored, ailgysylltu â natur, a darganfod pŵer bwyd dros dân.
Coginio Fel Cymuned
Wedi'i deilwra yn arbennig ar gyfer pob cymuned rydyn ni'n gweithio gyda hi, mae ein sesiynau coginio wythnosol yn dod â phobl gyda'i gilydd i wneud a rhannu pryd o fwyd.
O dan arweiniad ein cogyddion a gwirfoddolwyr, mae'r sesiynau hyn yn creu cysylltiadau, yn cynnig croeso cynnes, ac yn paratoi pryd iachus i’w rannu gyda phawb.
Clwb Coginio Teuluol
Mae ein Clwb Coginio Teuluol wedi'i gynllunio i ddod â theuluoedd gyda'i gilydd mewn amgylchedd coginio hamddenol lle gall pawb ddysgu gwneud prydau bwyd fforddiadwy a iachus. Mae’r sesiynau wedi'u dylunio fel y gall pob aelod o'r teulu gymryd rhan a mwynhau'r profiad. Y ffocws yw adeiladu hyder i goginio yn y cartref, ac yn helpu gwneud amser bwyta yn bleserus, yn gydweithredol ac yn hwyl.
Gweithdai wedi eu teilwra i chi
Rydym yn partneru â byrddau iechyd y GIG, cymdeithasau cymunedol a busnesau i redeg gweithdai coginio. O gefnogi rhieni ifanc gyda maeth babanod i archwilio'r cysylltiadau rhwng bwyd, iechyd meddwl a llesiant, rydym wedi cynnal cyrsiau sy'n cael effaith go iawn.
Mae pob gweithdy yn unigryw. Cysylltwch am ragor o wybodaeth.
Addysg Bellach ac Uwch
Un o'n prif amcanion wrth i ni sefydlu Cegin y Bobl yw edrych tua'r dyfodol – drwy fuddsoddi mewn addysg. Ochr yn ochr ag athrawon a phlant ysgol mae angen i ni fagu'r genhedlaeth nesaf o arweinwyr bwyd, llunwyr polisi a chogyddion a ffermwyr angerddol yng Nghymru. Felly rydym yn gweithio gyda phartneriaid gwych i ddarparu addysg gyffrous a go iawn mewn bwyd a choginio.
